Post Image

"ماتت وسابتلي الولدين والندم" هذا ما قاله الفنان أحمد السعدني بعد وفاة طليقته

بكلمات مؤثرة، وصدمة كبيرة، بعد تلقيه خبر وفاة حبيبته وطليقته وأم أولاده التي تعرضت لسكتة قلبية مفاجئة وهي لا زالت في عز شبابها ونشاطها وحيويتها، نشر الممثل المصري أحمد السعدني صورة له ولطليقته عبر حسابه على الإنستغرام، وعلق عليها بما يلي:

"عمري في حياتي ما اتكلمت عن حياتي الشخصيه لكن حسيت اني لازم اعمل كده دلوقتي
فذكر إن الذكري تنفع (المؤمنين) او الكافرين او المستهبلين او تنفع اي حد ححس اني عملت حاجه، ححاول مطولش، يوم ٩/٩/٢٠٠٣ حب من اول نظره في الشارع ما بين معهد السينما حيث كانت تدرس و معهد فنون مسرحيه حيث كنت الهو و ادرس برضه ميضرش كنت راكب عربية و كانت ماشيةعلي رجلها كنت حخبطها لكن حصل خير لا محصلش قوي خبطتتي هي في قلبي حب تقطيع شرايين سنة خطوبه سنة كتب كتاب شهر جواز خلفه اول ولد هنا بدأت المشكله اللي بكتب الكلام ده عشانها.
انا زي كتير للأسف شباب anti تحمل مسئوليه بص لنسب الطلاق وانت تفهم انا بيجيلي ارتيكريه لما احس اني مسؤول و هي برضه حبيبتي زي بنات كتير بتقول طلقني اكتر مبتنطق اسمي كانت النتيجه في اول سنة بس حوالي ٤ طلاق شفهي كل الشيوخ ساعتها قالولنا ده لعب عيال الطلاق ليه شروط زي الجواز تمام اسكت بقي لا تعالي يا عم طبق الشروط ادي اول طلقه
قشطه يا باشا عشت حياتك ؟ اه ...ارتحت ؟؟ لا 
وحشتني وحشني حنيتها و حبها وهبلها متيجي نرجع يا بت يالا يا متخلف هوووووب جبنا تاني ولد نفس الاحساس نفس الارتكريه بس المرادي صموووووود مش حينفع نتطلق تاني لا تصدق نفعت الجانب الاناني في شخصيتي غلبني يا عم كبر مخك وعيش حياتك المشكله اني عمري مارتحت كنت عايز حضنها و حنيتها و بلها بس كنت بأجل الرجوع يمكن اكبر او اعقل او اقدر اتحمل المسئوليه بجد حددت لنفسي سن معين ارجعلها فيه قال يعني حبقي نضجت بس ملحقتش
ماتت في لحظه كانت بتكلمني قبلها بساعه و مكنتش عيانه كان عندها ضغط زي اغلب الشعب المصري الحمد لله 
ماتت ومشيت وقررت تسبني للابد كنت فاكرها حتستناني ومتاكد من ده مستحيل تحب حد غيري مجاش في بالي انها ممكن تموت دلوقتي صغيره واكتر واحده في حياتي شفتها بتحب الحياه وعندها طاقة ايجابية 

ماتت و سابتلي الولدين و الندم 
انا متاكد انك في الجنه رحتي للي خلقك يوم عرفه واميرة وست البنات والستات و نضيفه وكريمة وصنتي ولادي وبيتي 
بحبك يا امل حياتي اللي اتهد وبوعدك المرادي حشيل المسئوليه للاسف اتعلمت الدرس بس بعد ما اتحرمت من حنيتك وحضنك وولادك كمان اتحرموا من احن ام ربنا يقدرني واربيهم احسن ما كنتي عايزه بحبك ومش بطلب منك غير انك تسامحيني 
ربنا يرحمك و يرحمني ويرحم ولادنا يا حبيبة عمري الوحيدة".

Comments